Moskva Anqarani Su-24 samolyoti uchuvchisi Oleg Peshkovning Suriyadagi o‘limiga sababchi bo‘lgan barcha shaxslarni topish va ularni javobgarlikka tortishga chaqiradi. Bu haqda Rossiya TIV rasmiy vakili Mariya Zaxarovaga tayanib, “Interfaks” xabar berdi.
Uning ta’kidlashicha, Izmir prokuraturasining rossiyalik uchuvchining qotili deb gumon qilinayotgan Alparslan Chelikka nisbatan jinoiy ish qo‘zg‘ashdan bosh tortishi “jiddiy xavotir va ko‘plab savollarni tug‘dirmasdan qolmaydi”.
“Turkiya adliyasi ataylab va mustaqil ravishda, og‘ir jinoyatni sodir etganligini omma oldida tan olgan kishini javobgarlikdan soqit qilayotgandek taassurot uyg‘onmoqda”, — dedi Zaxarova.
Avvalroq Turkiya prokuraturasi Rossiyaning Suriyada urib tushirilgan Su-24 samolyoti uchuvchisining qotili deb gumon etilayotgan Alparslan Chelikdan barcha ayblarni olib tashlagan edi.
Ma’lumot uchun, 2015-yilning 24-noyabr kuni Turkiyaning F-16 qiruvchisi Rossiyaning Su-24 bombardimonchi samolyotini Turkiya chegarasini buzib o‘tgani uchun urib tushirgan edi. Bu ikki davlat o‘rtasida keskinlik keltirib chiqardi.
Izoh (0)