Toshkent shahar hokimligi Axborot xizmati 9-may — Xotira va qadrlash kuni munosabati bilan O‘zbekiston poytaxtida tashkil etilayotgan tadbirlar ro‘yxatini e’lon qildi.
Ushbu kunni munosib o‘tkazish yuzasidan poytaxt hokimligi ham bir qator tadbirlarni tashkil etishni rejalashtirmoqda. Jumladan, har bir tuman hokimligi o‘z hududida ushbu sanani munosib nishonlash bo‘yicha aniq tadbirlarni belgilab olgan.
Joriy yilning 15-aprelidan to 15-may kunigacha davom etadigan tadbirlardan 1941—1945-yillardagi urush ishtirokchilarining uylariga tashrif buyurib, ularning holidan xabar olish, ularga sovg‘alar ulashish, uy-joy sharoitlarini o‘rganib, zarur choralar ko‘rish, bayram bilan qutlash ishlari alohida o‘rin olgan. Joylarda madaniyat, san’at va sport, adabiyot sohalarining vakillari ishtirokida uchrashuvlar, konsert dasturlari tashkil etiladi.
Har yili ta’lim muassasalarida o‘tkaziladigan “Avlodlar uchrashuvi”, “E’zoz”, “Ehtirom” kabi tadbirlarga joriy yilda “Tinchlik darsi” qo‘shiladi. Ushbu darslarda ijodkorlar tomonidan tayyorlangan “Tinchlik – ulug‘ ne’mat” deb nomlangan hujjatli film namoyishi, tinchlikning qadriga yetish, uni asrab-avaylash har bir fuqaroning burchi ekanligi mavzusidagi qiziqarli ma’ruzalar talaba va o‘quvchi yoshlar e’tiboriga havola qilinadi.
Ayni yoshlarning urush faxriylari, front ortida mehnat qilgan nuroniy otaxon va onaxonlar huzuriga tashrif buyurib, bir tomondan, ularning holidan xabar olishlari, ikkinchi tomondan, ularning xotiralaridan bahramad bo‘lishlariga qaratilgan “Tabrik” tadbirlari bu kunlarning qadriga yetishda yosh avlod qalbida katta o‘rin tutishi shubhasiz.
Talaba va o‘quvchi yoshlarning Xotira va qadrlash maydoni, O‘zbekiston tarixi davlat muzeyi, Qurolli kuchlar muzeyi hamda “Shahidlar xotirasi” yodgorlik majmuasiga mo‘ljallanayotgan sayohatlari ham ayni shu maqsadga xizmat qilishi shubhasiz.
Xotira va qadrlash kuni munosabati bilan Mustaqillik maydonining Xotira maydonida rasmiy tadbirlarning bo‘lib o‘tishi kutilmoqda.
Ba’zi saytlarda nazarda tutilayotgan “O‘lmas polk” aksiyasi rejalashtirilayotgan tadbirlar ro‘yxatida mavjud emas.
Izoh (0)