AQSh Markaziy razvedka boshqarmasi rahbari Jon Brennan 2001-yil 11-sentabrdagi teraktlar haqidagi ma’ruzaning maxfiy qismi chop etilishiga qarshi chiqdi, deb yozadi “RBK”. Brennanning bayonoti NBC telekanali efirida yangradi.
MRB rahbari so‘zlariga ko‘ra, kongressning tekshiruvi “dastlabki hisobot” bo‘lgan, xolos. Oxir-oqibat unda ko‘tarilgan masalalar 9/11 teraktini tekshirish bo‘yicha komissiya tomonidan “to‘liq tadqiq qilingan va o‘rganilgan”.
“Komissiya a’zolari Saudiya hukumati yoki alohida saudiyalik amaldorlar ‘Al-Qoida’ga moliyaviy ko‘mak ko‘rsatganini isbotlovchi hech qanday dalillar bo‘lmagani haqida aniq aytib o‘tdi”, — dedi Brennan.
“O‘ylashimcha, ba’zi odamlar Saudiya Arabistonining ishtirokini ko‘rsatib berish uchun tasdiqlanmagan, tekshirilmagan axborotga yopishib olishi mumkin, buni esa men juda juda noto‘g‘ri deb hisoblayman”, — deya qayd etdi u.
Teraktlar tekshiruvi haqidagi hisobot 2002-yilda e’lon qilingan, ammo uning 28 sahifalik qismi prezident kichik Jorj Bush qarori bilan maxfiy bo‘lib qolgan edi. AQSh OAVlari ushbu qismdan xabardor bo‘lgan kishilarga tayanib, u yerda Saudiya Arabistonining ba’zi jismoniy va yuridik shaxslari teraktlarga aloqador bo‘lishi mumkinligi haqida gapirilishini yozgan edi.
Aprelda hisobotning 28 sahifalik qismidan “o‘ta maxfiy” belgisi olib tashlanishi mumkinligi haqida xabarlar tarqaldi.