O‘zbekistonda fuqarolar yig‘inlari raislari va ularning maslahatchilari saylovi yuqori saviyada o‘tishi kutilmoqda

O‘zbekistonda fuqarolar yig‘inlari raislari va ularning maslahatchilari saylovi boshlanishiga sanoqli kunlar qoldi. Mahallalar hayotidagi muhim ijtimoiy-siyosiy jarayon bo‘lgan bu tadbirga puxta tayyorgarlik ko‘rilmoqda, deya xabar beradi  O‘zA.

— O‘zbekiston Respublikasining “Fuqarolar yig‘ini raisi (oqsoqoli) va uning maslahatchilari saylovi to‘g‘risida”gi qonunida saylovga tayyorgarlik ko‘rishdan boshlab uni o‘tkazishgacha bo‘lgan barcha jarayon tartibga solingan. Oliy Majlis Senati Kengashining qaroriga muvofiq, saylov joriy yilning may—iyun oylarida bo‘lib o‘tadi, — deydi O‘zbekiston Respublikasi Oliy Majlisi Senati Kengashining fuqarolar yig‘inlari raislari va ularning maslahatchilari saylovini tashkil etish hamda o‘tkazishga ko‘maklashuvchi komissiyasi a’zosi Abdurahmon Boboyev.

— Aholining huquqiy madaniyatini oshirish, ayniqsa, saylovga oid huquqiy bilimlarini mustahkamlashda OAV alohida o‘rin tutadi. Shuni inobatga olgan holda soha xodimlarining malakasini oshirishga qaratilgan seminar-treninglar tashkil etildi. Gazeta va jurnallarda maqola va suhbatlar, teleradiokanallarda tok-shou, ko‘rsatuv va eshittirishlar, internet saytlarda saylov bilan bog‘liq materiallar berib borilmoqda. Saylovlarni yoritishga mas’ul bo‘lgan axborot xizmatlarining faoliyati yo‘lga qo‘yilgan.

Saylovning eng muhim ahamiyatga ega jihati — fuqarolar yig‘ini raisi lavozimiga nomzodlarga qo‘yiladigan talablardir. Bunday shaxs katta hayotiy tajribaga, keng va chuqur bilimga ega bo‘lgan, mahallaning muammolarini chuqur tahlil qilib, negiziga yetib boradigan inson bo‘lishi lozim.

Fuqarolar yig‘inlari raislari maslahatchilari ham qonun talablari asosida saylanishi kerak. Maslahatchilar uchun ovoz berish saylov kuni fuqarolar yig‘ini raisi saylangandan so‘ng amalga oshiriladi. Maslahatchilar tegishli fuqarolar o‘zini o‘zi boshqarish organi hududida yashashi va doimiy ro‘yxatdan o‘tgan bo‘lishi shart. Fuqarolar yig‘ini faoliyatining asosiy yo‘nalishlari bo‘yicha komissiyalarga rahbarlik, qoida tariqasida, fuqarolar yig‘ini raisi va uning maslahatchilari tomonidan amalga oshiriladi.

Saylov jarayonida qonun talablariga to‘la rioya etish, uning yuqori saviyada o‘tishiga hissa qo‘shish nafaqat shunga mas’ul shaxslar, balki har bir fuqaroning burchi. Bu muhim tadbirda kutilgan natijaga erishish kelgusida mahallalar ravnaqi, pirovardida, mamlakat taraqqiyoti uchun xizmat qiladi.