Ўзбекистонда фуқаролар йиғинлари раислари ва уларнинг маслаҳатчилари сайлови бошланишига саноқли кунлар қолди. Маҳаллалар ҳаётидаги муҳим ижтимоий-сиёсий жараён бўлган бу тадбирга пухта тайёргарлик кўрилмоқда, дея хабар беради ЎзА.
— Ўзбекистон Республикасининг «Фуқаролар йиғини раиси (оқсоқоли) ва унинг маслаҳатчилари сайлови тўғрисида»ги қонунида сайловга тайёргарлик кўришдан бошлаб уни ўтказишгача бўлган барча жараён тартибга солинган. Олий Мажлис Сенати Кенгашининг қарорига мувофиқ, сайлов жорий йилнинг май—июнь ойларида бўлиб ўтади, — дейди Ўзбекистон Республикаси Олий Мажлиси Сенати Кенгашининг фуқаролар йиғинлари раислари ва уларнинг маслаҳатчилари сайловини ташкил этиш ҳамда ўтказишга кўмаклашувчи комиссияси аъзоси Абдураҳмон Бобоев.
— Аҳолининг ҳуқуқий маданиятини ошириш, айниқса, сайловга оид ҳуқуқий билимларини мустаҳкамлашда ОАВ алоҳида ўрин тутади. Шуни инобатга олган ҳолда соҳа ходимларининг малакасини оширишга қаратилган семинар-тренинглар ташкил этилди. Газета ва журналларда мақола ва суҳбатлар, телерадиоканалларда ток-шоу, кўрсатув ва эшиттиришлар, интернет сайтларда сайлов билан боғлиқ материаллар бериб борилмоқда. Сайловларни ёритишга масъул бўлган ахборот хизматларининг фаолияти йўлга қўйилган.
Сайловнинг энг муҳим аҳамиятга эга жиҳати — фуқаролар йиғини раиси лавозимига номзодларга қўйиладиган талаблардир. Бундай шахс катта ҳаётий тажрибага, кенг ва чуқур билимга эга бўлган, маҳалланинг муаммоларини чуқур таҳлил қилиб, негизига етиб борадиган инсон бўлиши лозим.
Фуқаролар йиғинлари раислари маслаҳатчилари ҳам қонун талаблари асосида сайланиши керак. Маслаҳатчилар учун овоз бериш сайлов куни фуқаролар йиғини раиси сайлангандан сўнг амалга оширилади. Маслаҳатчилар тегишли фуқаролар ўзини ўзи бошқариш органи ҳудудида яшаши ва доимий рўйхатдан ўтган бўлиши шарт. Фуқаролар йиғини фаолиятининг асосий йўналишлари бўйича комиссияларга раҳбарлик, қоида тариқасида, фуқаролар йиғини раиси ва унинг маслаҳатчилари томонидан амалга оширилади.
Сайлов жараёнида қонун талабларига тўла риоя этиш, унинг юқори савияда ўтишига ҳисса қўшиш нафақат шунга масъул шахслар, балки ҳар бир фуқаронинг бурчи. Бу муҳим тадбирда кутилган натижага эришиш келгусида маҳаллалар равнақи, пировардида, мамлакат тараққиёти учун хизмат қилади.
Изоҳ (0)