Gollivudlik shifokor: Prinsning o‘limiga dorilarning noo‘rin qo‘llanishi sabab bo‘lishi mumkin
21-aprel kuni 57 yoshida olamdan o‘tgan amerikalik xonanda Prinsning o‘limiga qabul qilingan dorilarning noo‘rin birikuvi va buning oqibatida “dozalarning tasodifan oshib ketishi” sabab bo‘lishi mumkin. Gollivudda taniqli bo‘lgan shifokor Dryu Pinski The New York Daily nashri sahifalarida shunday taxminni bildirgan, deya xabar beradi “TASS”.
Shifokorning fikricha, inson salomatligi va hayoti uchun o‘ta xavfli bo‘lgan bir paytning o‘zida og‘riq qoldiruvchi va tinchlantiruvchi vositalardan foydalanilishi nafas olishning to‘xtab qolishiga olib kelgan. “Bunday holatlarda, qoidaga ko‘ra, nafas olish to‘xtashi va tezkor o‘lim yuz beradi. Hatto dori-darmonlar shifokor tomonidan tavsiya etilgan taqdirda ham”, — deya ta’kidlagan Pinski.
Shifokor Prins surunkali kasalliklar, xususan, tos va son suyaklari tutashgan bo‘g‘indagi og‘riqlardan aziyat chekkani haqidagi ovozalarni sharhlar ekan, shunday bo‘lgan taqdirda ham og‘riq qoldiruvchi vositalarni muntazam emas, balki vaqti-vaqti bilan qabul qilish lozim bo‘lganini bildirgan va xonandaning o‘limini “narkotiklarga bog‘liq bo‘lmagan baxtsiz hodisa”, deb baholagan.
Eslatib o‘tamiz, oldinroq OAV Prins o‘limidan bir necha kun avval narkotiklarni ortiqcha dozada qabul qilganligi uchun davolangani haqida xabar tarqatgandi.
