Голливудлик шифокор: Принснинг ўлимига дориларнинг ноўрин қўлланиши сабаб бўлиши мумкин
21 апрель куни 57 ёшида оламдан ўтган америкалик хонанда Принснинг ўлимига қабул қилинган дориларнинг ноўрин бирикуви ва бунинг оқибатида «дозаларнинг тасодифан ошиб кетиши» сабаб бўлиши мумкин. Голливудда таниқли бўлган шифокор Дрю Пински The New York Daily нашри саҳифаларида шундай тахминни билдирган, дея хабар беради «ТАСС».
Шифокорнинг фикрича, инсон саломатлиги ва ҳаёти учун ўта хавфли бўлган бир пайтнинг ўзида оғриқ қолдирувчи ва тинчлантирувчи воситалардан фойдаланилиши нафас олишнинг тўхтаб қолишига олиб келган. «Бундай ҳолатларда, қоидага кўра, нафас олиш тўхташи ва тезкор ўлим юз беради. Ҳатто дори-дармонлар шифокор томонидан тавсия этилган тақдирда ҳам», — дея таъкидлаган Пински.
Шифокор Принс сурункали касалликлар, хусусан, тос ва сон суяклари туташган бўғиндаги оғриқлардан азият чеккани ҳақидаги овозаларни шарҳлар экан, шундай бўлган тақдирда ҳам оғриқ қолдирувчи воситаларни мунтазам эмас, балки вақти-вақти билан қабул қилиш лозим бўлганини билдирган ва хонанданинг ўлимини «наркотикларга боғлиқ бўлмаган бахтсиз ҳодиса», деб баҳолаган.
Эслатиб ўтамиз, олдинроқ ОАВ Принс ўлимидан бир неча кун аввал наркотикларни ортиқча дозада қабул қилганлиги учун даволангани ҳақида хабар тарқатганди.
