2016-yil boshidan beri O‘zbekistonda 95 ta yangi mahsulotning eksporti yo‘lga qo‘yildi

2016-yil boshidan buyon O‘zbekistonda oldin o‘z mahsulotlarini eksport qilmagan 583 ta yangi korxona eksport faoliyatiga jalb etildi, shuningdek, mahsulotlarning 95 ta yangi turini eksport qilish o‘zlashtirildi. Bu haqda Vazirlar Mahkamasining 15-aprel kuni bo‘lib o‘tgan majlisida aytildi, deb xabar beradi O‘zA.

Shuningdek, majlisda eksport tuzilmasini diversifikatsiyalash va turlarini kengaytirish, yangi tashqi bozorlarni o‘zlashtirish, shu asosda 2016-yil uchun belgilangan eksportning prognoz parametrlariga erishishni ta’minlash yuzasidan ko‘rilayotgan chora-tadbirlarni tahlil qilishga alohida e’tibor berildi.

“O‘zbekoziqovqatxolding” kompaniyasi va unga idoraviy mansub ixtisoslashtirilgan “O‘zagroeksport” tashqi savdo kompaniyasi, Qoraqalpog‘iston Respublikasi Vazirlar Kengashi, viloyatlar hokimliklari, Qishloq va suv xo‘jaligi vazirligi rahbarlari oldiga belgilangan maqsadli parametrlarga muvofiq yangi uzilgan va qayta ishlangan meva-sabzavot mahsulotlarini joriy yilda eksportga yetkazib berish hajmlari bo‘yicha o‘z vaqtida kontraktlar tuzilishini ta’minlash yuzasidan aniq vazifalar qo‘yildi.