Sakkiz vazn toifasida sobiq jahon chempioni, filippinlik bokschi Menni Pakyao 10-aprelga o‘tar kechasi Las-Vegas shahrida ikki vazn toifasida sobiq jahon chempioni, amerikalik Timoti Bredliga qarshi jang o‘tkazdi, deb xabar beradi “iSport.ua”.
12 raundlik jangda filippinlik bokschi hakamlarning yakdil qarori bilan 116:110, 116:110, 116:110 hisobida g‘alaba qozondi. Qayd etish kerakki, Pakyao 7 va 9-raundlarda AQSh vakilini nokdaunga uchratdi.
Menni Pakyao va Timoti Bredli o‘zaro uchinchi jangini o‘tkazdi. 2012-yilda amerikalik bokschi, 2014-yilda esa filippinlik charm qo‘lqop ustasi muvaffaqiyat qozongan edi. Ta’kidlash kerakki, 37 yoshli Pakyaoning Bredli bilan jangi 2015-yilning may oyida boshqa bilan amerikalik bokschi Floyd Meyvezerdan uchralgan mag‘lubiyatdan so‘ng birinchisi bo‘ldi.
“Sports.ru” nashrining ma’lum qilishcha, filippinlik bokschi o‘tkazgan jangidan mamnun bo‘ldi. Shuningdek, Pakyao faoliyatini yakunlashga qaror qilganini ta’kidlab o‘tdi.
“Bredliga qarshi o‘tkazilgan ushbu jang avvalgi ikkisidan farq qiladi. Bu safar tajovuzkor va ancha samarali harakat qildim. Lekin osonlik bilan g‘alaba qozondim, deya olmayman. Chunki Bredli avvalgi janglardan keyin tajriba orttirib, nisbatan kuchliroq bo‘ldi”, – deydi Pakyao.
“Men hamon jang qila olaman, lekin Filippinga qaytishga va professional faoliyatimni yakunlashga qaror qildim”, – deya fikriga yakun yasadi filippinlik bokschi.
Ma’lumot o‘rnida, Menni Pakyao professional boksda 66 ta jang o‘tkazib, 58 ta g‘alaba (38 tasi nokaut bilan), 6 ta mag‘lubiyat va 2 ta durang qayd etgan. Timoti Bredli o‘tkazgan 36 ta jangning 33 tasida (13 tasi nokaut bilan) zafar quchgan bo‘lsa, 2 tasida mag‘lub bo‘lgan va 1 ta jangda g‘olib nomi aniqlanmagan.
Izoh (0)