Саккиз вазн тоифасида собиқ жаҳон чемпиони, филиппинлик боксчи Мэнни Пакьяо 10 апрелга ўтар кечаси Лас-Вегас шаҳрида икки вазн тоифасида собиқ жаҳон чемпиони, америкалик Тимоти Брэдлига қарши жанг ўтказди, деб хабар беради «iSport.ua».
12 раундлик жангда филиппинлик боксчи ҳакамларнинг якдил қарори билан 116:110, 116:110, 116:110 ҳисобида ғалаба қозонди. Қайд этиш керакки, Пакьяо 7 ва 9-раундларда АҚШ вакилини нокдаунга учратди.
Мэнни Пакьяо ва Тимоти Брэдли ўзаро учинчи жангини ўтказди. 2012 йилда америкалик боксчи, 2014 йилда эса филиппинлик чарм қўлқоп устаси муваффақият қозонган эди. Таъкидлаш керакки, 37 ёшли Пакьяонинг Брэдли билан жанги 2015 йилнинг май ойида бошқа билан америкалик боксчи Флойд Мейвезердан учралган мағлубиятдан сўнг биринчиси бўлди.
«Sports.ru» нашрининг маълум қилишча, филиппинлик боксчи ўтказган жангидан мамнун бўлди. Шунингдек, Пакьяо фаолиятини якунлашга қарор қилганини таъкидлаб ўтди.
«Брэдлига қарши ўтказилган ушбу жанг аввалги иккисидан фарқ қилади. Бу сафар тажовузкор ва анча самарали ҳаракат қилдим. Лекин осонлик билан ғалаба қозондим, дея олмайман. Чунки Брэдли аввалги жанглардан кейин тажриба орттириб, нисбатан кучлироқ бўлди», – дейди Пакьяо.
«Мен ҳамон жанг қила оламан, лекин Филиппинга қайтишга ва профессионал фаолиятимни якунлашга қарор қилдим», – дея фикрига якун ясади филиппинлик боксчи.
Маълумот ўрнида, Мэнни Пакьяо профессионал боксда 66 та жанг ўтказиб, 58 та ғалаба (38 таси нокаут билан), 6 та мағлубият ва 2 та дуранг қайд этган. Тимоти Брэдли ўтказган 36 та жангнинг 33 тасида (13 таси нокаут билан) зафар қучган бўлса, 2 тасида мағлуб бўлган ва 1 та жангда ғолиб номи аниқланмаган.
Изоҳ (0)