Niderlandiya Suriyaning ochlikdan aziyat chekayotgan aholisi uchun 4 mln yevro ajratadi

Niderlandiya tashqi savdo va hamkorlikni rivojlantirish vaziri Lilianne Plumen mamlakat Suriyaning ochlikdan aziyat chekayotgan aholisiga yordam berish uchun 4 million yevro ajratishini ma’lum qildi. Bu haqda “TASS” xabar bermoqda.

Uning so‘zlariga ko‘ra, Suriyadagi vaziyat kundan-kunga og‘irlashib bormoqda. “Millionlab odamlarning bundan yomoni bo‘lmasligiga ishonchi komil edi, ammo endi ularga ochlikdan vafot etish xavf solmoqda, — dedi vazir. — Bu bunday vaziyatning yuzaga kelishiga qo‘yib bergan bir-biriga qarshi kurashayotgan tomonlar uchun haqiqiy sharmandalik”.

Niderlandiya tomonidan ajratilgan pullar Suriyaning Qizil Xoch tashkiloti orqali oziq-ovqat, ichimlik suvi va isitish jihozlarini xarid qilish uchun sarflanadi.

Olingan ma’lumotlarga ko‘ra, qamaldagi Madaya shahrida so‘nggi oyda ochlikdan 32 kishi nobud bo‘lgan. Boshqa aholi punktlarida ham vaziyat og‘ir.

Niderlandiya Suriyaning eng yirik donorlaridan biri hisoblanadi. 2015-yilda ushbu mamlakat Suriya aholisiga yordam ko‘rsatish uchun 200 million yevro yuborgan edi.