Нидерландия ташқи савдо ва ҳамкорликни ривожлантириш вазири Лилианне Плумен мамлакат Суриянинг очликдан азият чекаётган аҳолисига ёрдам бериш учун 4 миллион евро ажратишини маълум қилди. Бу ҳақда «ТАСС» хабар бермоқда.
Унинг сўзларига кўра, Суриядаги вазият кундан-кунга оғирлашиб бормоқда. «Миллионлаб одамларнинг бундан ёмони бўлмаслигига ишончи комил эди, аммо энди уларга очликдан вафот этиш хавф солмоқда, — деди вазир. — Бу бундай вазиятнинг юзага келишига қўйиб берган бир-бирига қарши курашаётган томонлар учун ҳақиқий шармандалик».
Нидерландия томонидан ажратилган пуллар Суриянинг Қизил Хоч ташкилоти орқали озиқ-овқат, ичимлик суви ва иситиш жиҳозларини харид қилиш учун сарфланади.
Олинган маълумотларга кўра, қамалдаги Мадая шаҳрида сўнгги ойда очликдан 32 киши нобуд бўлган. Бошқа аҳоли пунктларида ҳам вазият оғир.
Нидерландия Суриянинг энг йирик донорларидан бири ҳисобланади. 2015 йилда ушбу мамлакат Сурия аҳолисига ёрдам кўрсатиш учун 200 миллион евро юборган эди.
Изоҳ (0)