Hindistonning yetakchi klinikalaridan biri O‘zbekiston sog‘liqni saqlash vazirligi bilan hamkorlikka kirishadi

Hindistondagi yetakchi klinikalardan biri BLK Super Specialty Hospital O‘zbekiston Sog‘liqni saqlash vazirligining xalqaro iqtisodiy aloqalar bo‘limi bilan niyatlar haqida bayonnoma imzoladi. Unga muvofiq, tomonlar kelasi uch yil davomida O‘zbekiston fuqarolariga diagnostika va ixtisoslashtirilgan konsultatsiya sohasida taqdim etilayotgan xizmatlar sifatini BLK Super Specialty Hospital ko‘magida oshirishni rejalashtirmoqda.

Ushbu klinika mutaxassislari, shuningdek, O‘zbekiston hududida jarrohlik va davolash xizmatlari sohasida ilmiy tadqiqotlarni rivojlantirish ustida ish olib boradi.

BLK Super Specialty Hospital ijrochi direktori Naresh Kapur ta’kidlashicha, klinika tug‘ma yurak kasalligidan azob chekuvchi bemorlar uchun jarrohlik operatsiyalarini o‘tkazishni rejalashtirmoqda. Bunday operatsiyalar BLK Super Specialty Hospital klinikasida, shuningdek, O‘zbekistondagi ixtisoslashtirilgan klinikalarda olib boriladi.

Ushbu bayonnoma shartlariga ko‘ra, O‘zbekistondagi nochor oilalarning tug‘ma yurak kasalliklaridan azob chekuvchi farzandlariga tibbiy ko‘mak beriladi. Bundan tashqari, xasta bolalarni ko‘rikdan o‘tkazish va ularni operatsiya qilish uchun zarur sharoitlar yaratib beriladi.