O‘zbekiston hududida 2016-yilning dastlabki ikki haftasi davomida intensivligi ikki balldan yuqori bo‘lgan kamida olti zilzila sezildi. Yilning birinchi yerosti silkinishlari 1-yanvar kuni Toshkent vaqti bilan 8:26 da qayd etildi — zilzila intensivligi Andijonda 2—3 ballga teng bo‘ldi.
2- va 8-yanvar kunlari Afg‘onistonda yuz bergan zilzilalar Toshkentda 2 ball bo‘lib sezildi. 9-yanvar kuni O‘zbekistonda, aniqrog‘i, Yangiyo‘l shahri yaqinida zilzila qayd etildi.
13-yanvar kuni Afg‘onistonda yuz bergan zilzila kuchi Toshkentga 2—3 ball bo‘lib yetib kelgan bo‘lsa, 14-yanvar kuni Toshkent vaqti bilan 8:24 da O‘zbekiston—Qozog‘iston chegarasida navbatdagi zilzila qayd etildi.
“Kuzatilayotgan kuchsiz zilzilalar to‘planib qolgan ortiqcha kuchlanishlarni tarqatish bilan bog‘liq odatiy jarayondir. Bunday kuchsiz zilzilalar bo‘lmasa, hushyor tortamiz”, — deya “Daryo” internet-nashriga axborot berdi O‘zbekiston Fanlar akademiyasi Seysmologiya instituti direktori Sabriddin Husamiddinov.
Mutaxassislarning qayd etishicha, Markaziy Osiyo va O‘zbekiston hududida kuzatilayotgan seysmik faollik 2018-yilga qadar davom etishi mumkin.
Avvalroq, O‘zbekiston Favqulodda vaziyatlar vazirligi aholini zilzila va yerosti silkinishlari vaqtida qo‘rqmaslikka chaqirgani haqida xabar berilgan edi.
Izoh (0)