Kecha, 13-yanvar kuni bo‘lib o‘tgan O‘zbekiston va Janubiy Koreya olimpiya terma jamoalari o‘rtasidagi o‘yindan keyin Osiyoning 2015-yildagi eng yaxshi yosh futbolchisi Dostonbek Hamdamovga sovrin topshirildi. Bu haqda “Stadion.uz” xabar bermoqda.
OFK vitse-prezidenti va musobaqalarni o‘tkazish qo‘mitasi boshlig‘i Saud al-Muhannadiy matbuot anjumanida o‘zbekistonlik futbolchiga sovrinni topshirdi.
“Osiyo futboli o‘z iqtidorini xalqaro musobaqalarda namoyish qilgan futbolchilarni doimo rag‘batlantirib keladi. Dostonbek Hamdamov 2015-yilda o‘zining yuqori saviyasini ko‘rsata oldi. Ishonchim komil, bundan keyingi qit’a va jahondagi musobaqalarda futbolchi yanada yaxshiroq o‘yin namoyish qila oladi”, — dedi Muhannadiy.
Dostonbek 2015-yilda Yangi Zelandiyada bo‘lib o‘tgan yoshlar o‘rtasidagi jahon chempionatida ishtirok etib, terma jamoa bilan birgalikda chorak finalgacha yetib bordi hamda 3 ta gol bilan musobaqa to‘purarlari orasida 3-o‘rinni oldi. Hamdamov 2015-yil 29-noyabrda Osiyoning eng yaxshilarini taqdirlash marosimida qit’aning eng yaxshi yosh futbolchisi deb topilgandi.
Eslatib o‘tamiz, U-23 Osiyo chempionatining 1-turida O‘zbekiston Janubiy Koreyaga 1:2 hisobida yutqazib qo‘ydi. O‘zbekiston safidan yagona golni aynan Dostonbek Hamdamov kiritdi.
Izoh (0)