Belarus prezidenti Aleksandr Lukashenko Minskdagi stadion kiraverishida Si Szinpin haykalini o‘rnatishni taklif qildi. Bu haqda “Pul Pervogo” Telegram kanali xabar berdi.
Ma’lum qilinishicha, 7-iyun kuni Minskda Milliy stadion ochilishi marosimi bo‘ldi. Ushbu stadion Xitoydan ajratilgan mablag‘ evaziga qurilgan va loyiha to‘liq Xitoy tomonidan amalga oshirilgan.
“Bu stadion shunchaki sport inshooti emas, balki Belarus futboli yuksalishi ramzi va Xitoy bilan do‘stlikni mustahkamlash yo‘lidagi yana bir qadamdir. Axir bu obyekt Xitoy sovg‘asidir”, deyiladi xabarda.
Stadion kiraverishida ikki futbolchi yonma-yon turgani aks etgan haykal o‘rgatilgan bo‘lib, u belaruslik va xitoylik futbolchilarni aks ettiradi. Lukashenko haykalni ko‘rganida “Bu yerda Si Szinpin haykalini o‘rnatish kerak” deb aytgan.
“Bu yerda do‘stim Si Szinpinga haykal o‘rnatish kerak, chunki uning sharofati bilan xitoyliklar o‘z mablag‘lari evaziga Yevropada kamyob bo‘lgan bu ajoyib stadionni qurdi”, degan Lukashenko ochilish marosimida so‘zlagan nutqida.
Ma’lum qilinishicha, Xitoy tomoni sovg‘a sifatida Belarus xalqiga xalqaro darajadagi basseyn ham qurib, topshirgan.
Izoh (0)