O‘zbekistonda yo‘lni kesib o‘tayotgan piyodalarning telefon va yoki planshetdan foydalanishi taqiqlandi

O‘zbekistonda 2016-yil 1-martdan boshlab Yo‘l harakati qoidalari (YHQ)ning yangi tahriri kuchga kiradi, deya xabar bermoqda O‘zA.

Agentlikning qayd etishicha, qoidalarga “Bolalar guruhini tashkiliy tashish” atamasi kiritildi. Unga ko‘ra, sakkiz va undan ortiq bolani avtobusda tashish tashkiliy tashish ekanligi belgilab qo‘yildi.

Shuningdek, endilikda piyodalar yo‘llarda yurganda, o‘zlari uchun ajratilgan joylardan kesib o‘tayotganda diqqatni chalg‘ituvchi narsalar, jumladan, telefon, planshetdan foydalanish, video ko‘rish, gazeta, jurnal va kitob o‘qishi taqiqlanadi.

Avvalroq, YHQning yangi tahririda “Foto va videofiksatsiya” axborot-ishora belgisi paydo bo‘lgani, skuterlar va kvadrotsikllar esa mototsikllarga tenglashtirilgani haqida xabar berilgan edi.