Guardian: Zimbabve prezidentining rafiqasi mamlakat boshqaruvini o‘z qo‘liga oldi

Zimbabvening muxolifatdagi “Demokratik o‘zgarishlar uchun harakat” partiyasi (MDC) rahbari Morgan Svangirai mamlakat prezidenti Robert Mugabening rafiqasi Greys Mugabe davlat boshqaruvini qo‘lga olganini ma’lum qildi. Uning ta’kidlashicha, Greys deyarli mamlakat prezidenti vazifasini bajarmoqda, mahalliy hukumat esa falajlik holatiga tushib qolgan. Bu haqda Guardian manbalariga tayanib, “RIA Novosti” xabar bermoqda.

Nashrning ta’kidlashicha, Greys Mugabe keyingi paytda Zimbabve siyosiy hayotida nufuzli shaxsga aylangan: o‘tgan yil dekabrida u mamlakat hukmron partiyasidagi muhim lavozimlardan birini egallagandi. Biroq ortib borayotgan nufuziga qaramay, qimmatbaho buyumlar xarid qilish uchun xorijga tez-tez safar uyushtiradigan Greysning iqtisodiy qiyinchiliklardan boshi chiqmayotgan mamlakat aholisi orasidagi obro‘si juda past.

Zimbabve prezidenti Robert Mugabe dunyodagi eng keksa amaldagi davlat rahbari sanaladi. U 2018-yili, 94 yoshga to‘lganida ham prezidentlik saylovlarida ishtirok etish niyatida.