Toshkentda piyodalar o‘tish joyi oldida to‘xtagan avtomobil haydovchisiga chet elliklar minnatdorchilik bildirdi

Toshkentning Amir Temur xiyobonidagi piyodalar o‘tish joyida to‘planib qolgan odamlarni o‘tkazib yuborish uchun to‘xtagan avtomobil haydovchisiga chet elliklar minnatdorchilik bildirdi. Voqea videosi Facebook’dagi “Voditeli Tashkenta” guruhida e’lon qilingan.

“Chet ellik piyodalar minnatdorchilik bildirdi”, — deb xabar qoldirgan video muallifi vaziyatdan zavq olganini yashirmagan.

Videoda chet ellik sayyohlarning nisbatan katta guruhi avtomobillar oqimi tugashini kutib, piyodalar o‘tish joyi oldida to‘planib qolganini ko‘rish mumkin. Video muallifining avtomobili to‘xtashi bilan, chet ellik piyodalar haydovchiga minnatdorchilik bildirgan holda, yo‘lni kesib o‘tgan.

Videoxabar ostida fikr bildirgan foydalanuvchilarning aksariyati xorij mamlakatlarida piyodalar har safar ularga yo‘l bergan avtomobillarning haydovchilariga minnatdorchilik bildirishi, bu an’anaviy holat ekanligini ta’kidlagan. Bir guruh foydalanuvchilar bu haydovchining ishi hurmatga loyiq ekanligini qayd etib o‘tgan.