MDH mamlakatlari va Gruziya orasida qozoq tengesi 2015-yil davomida dollarga nisbatan eng ko‘p qadrsizlangan pul birligiga aylandi. Bu haqda, Qirg‘iziston Milliy banki ma’lumotlariga asoslanib, KNews xabar bermoqda.
Qozog‘iston milliy valyutasi 2015-yil davomida dollarga nisbatan 68 foizga qadrsizlandi. Qozog‘iston Milliy banki ma’lumotlariga ko‘ra, hozirgi vaqtda 1 AQSh dollari 307,4 tengega teng.
Valyutasi dollarga nisbatan qadrsizlangan MDH mamlakatlari va Gruziya reytingida O‘zbekiston 11-o‘rinni egalladi — hisobot davrida o‘zbek so‘mi dollarga nisbatan 12,94 foizga qadrsizlangan. Dollarga nisbatan eng kam qadrsizlangan valyuta arman drami bo‘ldi (12-o‘rin, 1,46 foiz).
Milliy pul birligining qadrsizlanishi bo‘yicha tengedan keyingi o‘rinlarni Belarus rubli (52 foiz), ukrain grivnasi (51,47 foiz), Ozarbayjon manati (34,01 foiz), qirg‘iz so‘mi (28,87 foiz), Moldova leyi (28,78 foiz), gruzin larisi (27,79 foiz), tojik somonisi (26,69 foiz), turkman manati (22,81 foiz) va Rossiya rubli (17,78 foiz) egallagan.
Qayd etish joiz, dollar kursining mustahkamlanishi butun dunyo bo‘yicha kuzatilmoqda.
Izoh (0)