Namangan viloyatida “23 yoshni qarshi olgan, hali oila qurishga ulgurmagan”, ayni vaqtda aldov yo‘li bilan boshqa fuqarolarning pullarini o‘zlashtirish bilan shug‘ullanib kelgan shaxs sudlandi. Bu haqda “Huquq” gazetasi xabar bermoqda.
Namangan shahar prokurorining yordamchisi Sherzod Jumaboyevning ma’lum qilishicha, sudlanuvchi otasini Haj ziyoratiga yuborish niyatida bo‘lgan shaxsning ishonchiga kirib, bu masalada unga yordam bera olishini ma’lum qilgan.
U jabrlanuvchining otasi bilan uchrashganidan so‘ng, “davlat boji uchun pul to‘lash kerak” degan bahona bilan otaxondan 900 AQSh dollari olgan. Biroq masala ijobiy hal bo‘lmaganidan so‘ng, jabrlanuvchilar huquqni muhofaza qiluvchi organlarni murojaat qilgan.
“Ayblanuvchi sud hukmi bilan oylik ish haqining 20 foizi davlat foydasiga undirib borilishi sharti bilan ikki yil muddatga axloq tuzatish ishi jazosiga tortildi”, — deyiladi gazeta xabarida.
Avvalroq, Kosonsoy tumanidagi mahalla raislaridan biri hamqishlog‘ini Haj ziyoratiga boruvchilar ro‘yxatiga qo‘shib qo‘yish va’dasi bilan undan 200 dollar olgani uchun sudlangani haqida xabar berilgan edi.
Izoh (0)