Zarafshonda otasining jasadini olib ketishga kelgan o‘g‘ildan sud-tibbiy eksperti 150 ming so‘m pul talab qildi
Navoiy viloyatining Zarafshon shahridagi Tibbiy-sanitariya qismining patologiya-anatomiya bo‘limi mudiri otasining jasadini olib ketish uchun kelgan fuqarodan 150 ming so‘m talab qilgani uchun 5 yilga ozodlikdan mahrum etildi. Bu haqda “Huquq” gazetasining 5-noyabr sonida axborot berilgan.
Ma’lum bo‘lishicha, jabrlanuvchining otasi Uchquduq tumanidagi dala-hovli hammomidan is gazidan o‘lgan holda topiladi. O‘sha tunda jasad maxsus ko‘rikdan o‘tkazish maqsadida Markaziy qon boshqarmasiga qarashli Tibbiy-sanitariya qismining patologiya-anatomiya bo‘limiga olib ketiladi.
Ertasi kuni jabrlanuvchi otasining jasadini olib ketish uchun patologiya-anatomiya bo‘limiga keladi, biroq bo‘lim mudiri jasad hali to‘liq o‘rganilmagani, 14:00 da murdani olib ketish mumkinligini aytadi, keyinroq muddat 16:00 ga ko‘chiriladi.
Kutishdan charchagan azadorlar 17:00 da mudirning oldiga kirishadi, mudir mayit bilan bog‘liq barcha hujjatlarni rasmiylashtirish va jasadni o‘g‘ilga topshirish uchun 150 ming so‘m pul so‘raydi. Pul berilganidan so‘ng, jasadni olib ketishga ruxsat beradi.
Mudir azadordan olgan pulini o‘sha kuni kechki vaqtda ziyofat uchun ishlatib yuboradi. Mas’ul xodimlarining noqonuniy xatti-harakatlaridan qattiq g‘azablangan azador o‘g‘il esa oradan ikki kun o‘tib, tegishli organlarga murojaat qiladi. Mudir olgan pulini qaytarib berayotgan vaqtida qo‘lga olinadi.
“Jinoyat ishlari bo‘yicha Zarafshon shahar sudining hukmi bilan mudir 5 yil muddatga ozodlikdan mahrum etildi”, — deyiladi “Huquq” gazetasi xabarida.
