Наманган вилоятида «23 ёшни қарши олган, ҳали оила қуришга улгурмаган», айни вақтда алдов йўли билан бошқа фуқароларнинг пулларини ўзлаштириш билан шуғулланиб келган шахс судланди. Бу ҳақда «Ҳуқуқ» газетаси хабар бермоқда.
Наманган шаҳар прокурорининг ёрдамчиси Шерзод Жумабоевнинг маълум қилишича, судланувчи отасини Ҳаж зиёратига юбориш ниятида бўлган шахснинг ишончига кириб, бу масалада унга ёрдам бера олишини маълум қилган.
У жабрланувчининг отаси билан учрашганидан сўнг, «давлат божи учун пул тўлаш керак» деган баҳона билан отахондан 900 АҚШ доллари олган. Бироқ масала ижобий ҳал бўлмаганидан сўнг, жабрланувчилар ҳуқуқни муҳофаза қилувчи органларни мурожаат қилган.
«Айбланувчи суд ҳукми билан ойлик иш ҳақининг 20 фоизи давлат фойдасига ундириб борилиши шарти билан икки йил муддатга ахлоқ тузатиш иши жазосига тортилди», — дейилади газета хабарида.
Аввалроқ, Косонсой туманидаги маҳалла раисларидан бири ҳамқишлоғини Ҳаж зиёратига борувчилар рўйхатига қўшиб қўйиш ваъдаси билан ундан 200 доллар олгани учун судлангани ҳақида хабар берилган эди.
Изоҳ (0)