“O‘zbekiston temir yo‘llari” kompaniyasi Toshkent mexanika zavodi (TMZ, sobiq “V.Chkalov nomidagi Toshkent aviatsiya ishlab chiqarish birlashmasi”) negizida temiryo‘l vagonlari ishlab chiqaradigan korxona tashkil qilish uchun 202 million dollar miqdorida sarmoya kiritadi. Bu haqda “Gazeta.uz” xabar bermoqda.
Hukumat qarori bilan tasdiqlangan dastur 4 yo‘nalish bo‘yicha — yangi yuk vagonlari (yiliga 650 ta), muzlatish bo‘lmalari va konteynerlar (300 ta), yo‘lovchi vagonlari (50 ta), shuningdek, ehtiyot va butlovchi qismlar ishlab chiqarish singari 14 ta loyihani qamrab oladi. Loyihalar temiryo‘l kompaniyasining o‘z mablag‘lari hisobidan moliyalashtiriladi.
Dasturni amalga oshirish uchun “O‘zbekiston temir yo‘llari”ning nizom jamg‘armasiga TMZning 81,52 foiz miqdoridagi davlat aktivlari o‘tkazib berildi. Yil oxirigacha korxonani kompaniyaning ishlab chiqarish tuzilmasiga integratsiya qilish rejalashtirilmoqda. TMZga 2018-yilning 1-yanvariga qadar yangi ishlab chiqarish sohalari samarali ishlashi uchun bir qancha soliq va bojxona imtiyozlari berildi.
2013-yil sentyabrida “O‘zbekiston temir yo‘llari” “Quyuv mexanika zavodi” sho‘ba korxonasida vagonlarni ta’mirlash va vagon ishlab chiqarishni tashkil qilishni 150 million dollarlik mablag‘ hisobiga modernizatsiya qilgan edi.
Hisob-kitoblarga qaraganda, loyihani amalga oshirish Rossiya, Belarus va Qozog‘iston bozorlaridan yirik buyurtmalar olish imkonini beradi. 2010-yilda “Quyuv mexanika zavodi” Rossiyaning Temiryo‘l transporti federal agentligi sertifikatlash registridan vagonlarni ko‘plab ishlab chiqarish uchun sertifikat va ruxsatnoma olgan edi.
Izoh (0)