Япония бош вазири Синдзо Абэ 24 октябрь, шанба куни Ўзбекистонда расмий ташриф билан бўлади. У «Жаҳон» ахборот агентлигига берган интервьюсида мазкур ташрифнинг икки мамлакат ўртасидаги алоқаларни мустаҳкамлашдаги аҳамиятига алоҳида эътибор қаратди, дея хабар беради «Газета.uz».
«Орадан тўққиз йил ўтиб Япония бош вазирининг Ўзбекистонга расмий ташрифи амалга ошишидан бениҳоят мамнунман. Президент Ислом Каримов билан учрашувимиз чоғида сиёсат, иқтисодиёт ва маданиятга оид кенг кўламдаги масалаларни батафсил муҳокама этиш ниятидаман», — дея таъкидлаган Синдзо Абэ.
Бош вазир Ўзбекистон Марказий Осиё минтақаси тараққиёти ва барқарорлигида муҳим ўрин тутадиган йирик давлат эканлигига урғу берди. «Буни инобатга олиб, Ўзбекистон билан нафақат икки томонлама муносабатларни мустаҳкамлаш, балки минтақа учун умумий бўлган транспорт, логистика, сув таъминоти, электр энергияси, наркосавдога қарши кураш ҳамда давлат чегараларини қўриқлаш масалаларини ҳал этиш борасида ҳамкорликни давом эттиришни мақсад қилганмиз», — дейди Синдзо Абэ.
Савдо ва иқтисодий соҳадаги алоқаларга келганда, бош вазир япон компаниялари Ўзбекистон саноатини диверсификация қилишга салмоқли ҳисса қўшаётган автобуслар ва юк транспорти ишлаб чиқариш, кимёвий ўғитлар заводи қурилиши, ахборот технологияларини ривожлантириш каби қатор лойиҳаларда иштирок этаётганини билдирди. Шу билан бирга, Ўзбекистоннинг улкан салоҳиятини ҳисобга олган ҳолда, «икки давлат ўртасида савдо-иқтисодий муносабатларни ривожлантириш учун катта имкониятлар борлиги»ни қайд этди.
Япония бош вазирига ташриф давомида япон иқтисодиёти вакилларидан иборат катта делегация ҳамроҳлик қилади. «Делегациянинг келиши Ўзбекистонга япон компаниялари кириб бориши, фаолиятини олдинга силжишига кўмак беради. Япон технологиялари ва тажрибаси эса Ўзбекистон тараққиётида муайян даражада қўл келишига умид қиламан», — дея таъкидлаган бош вазир.
Изоҳ (0)