Эрон ташқи ишлар вазири Муҳаммад Жавод Зариф ва унинг германиялик ҳамкасби Франк-Вальтер Штайнмайер Хавфсизлик бўйича Мюнхен конференцияси мақсадли гуруҳи мажлиси арафасида Теҳронда ўзаро музокаралар ўтказди. Бу ҳақда «ТАСС» хабар бермоқда.
Эроннинг IRNA агентлиги хабарига кўра, икки мамлакат ташқи ишлар вазирлари иштирокида 17 октябрь, шанба куни бўлган мулоқот чоғида Суриядаги инқироздан чиқиш йўллари ҳамда июль ойида Эрон ва халқаро воситачилар ўртасида имзоланган келишувнинг амалга оширилиши муҳокама қилинган.
Маълумот учун, Теҳронда 17 октябрь, шанба куни Яқин ва Ўрта Шарқ ҳамда Европа мамлакатларининг ташқи ишлар вазирлари, парламент қўмиталари раҳбарлари ва бошқа юқори мартабали вакиллари иштирокида хавфсизликни таъминлаш соҳасидаги минтақавий ва халқаро муаммоларни норасмий тартибда муҳокама қилиш мақсадида Хавфсизлик бўйича Мюнхен конференциясининг мақсадли гуруҳи мажлиси бўлиб ўтади.
Конференцияда Афғонистон ташқи ишлар вазири Салоҳуддин Раббоний, Ироқ ташқи ишлар вазири Иброҳим ал-Жаъфарий, Ироқ Курдистони бош вазири Нечирван Идрис Барзоний, БМТнинг Сурия бўйича махсус вакили ўринбосари Рамзи Иззеддин Рамзи, Европа ташқи сиёсат хизмати бош котибининг сиёсий масалалар бўйича ўринбосари Хелга Шмид, Франция парламенти қуйи палатасининг Ташқи ишлар бўйича қўмитаси раиси Элизабет Гигу ва Бундестагнинг Ташқи ишлар бўйича қўмитаси раиси Норберт Рёттген, шунингдек, араб мамлакатлари ҳукуматлари вакиллари ва Европа мамлакатлари парламентлари депутатлари қатнашади.
50 йилдан бери ташкил этиб келинаётган Хавфсизлик бўйича Мюнхен конференцияси доирасида 2009 йилдан буён жаҳоннинг турли мамлакатлари пойтахтлари минтақавий муаммолар муҳокамасига бағишлаб, мақсадли гуруҳлар учрашувлари ўтказилмоқда. Шундай гуруҳларнинг сўнгги мажлислари Доҳа (2013), Нью-Дели (2014) ва Венада (2015) бўлиб ўтганди. Теҳрондан кейинги мажлис 2016 йил апрелида Эфиопия пойтахти Аддис-Абебада бўлади.
Изоҳ (0)