Anqara sudi OAVlarda Turkiya poytaxtida 10-oktabr kuni sodir bo‘lgan terakt haqida ma’lumotlar chop etilishini taqiqladi, deya xabar bermoqda “Yevropeyskaya Pravda”.
Taqiq teraktni tergov qilish yakuniga yetgunicha amalda bo‘ladi.
Ushbu chora axborot manbalarining barcha turlari: matbuot, televideniye, radio, shuningdek, internet OAVlar va ijtimoiy tarmoqlar orqali e’lon qilinishi mumkin bo‘lgan barcha turdagi yangiliklar, intervyu, tanqidiy maqolalarga tegishli bo‘ladi.
Avvalroq Turkiya politsiyasi mamlakat poytaxti Anqaradagi teraktning ikki ijrochisidan biri IShID terrorchilik guruhi a’zosi deb gumon qilinayotgan shaxsning akasi bo‘lganligini ma’lum qilgan edi.
Eslatib o‘tamiz, 10-oktabr, shanba kuni tongda Anqara markazidagi vokzal binosi yaqinida 3 soniyalik interval bilan ikkita portlash yuz berdi. Terakt sodir bo‘lgan vaqtda vokzal oldidagi maydonda kurd tuzilmalari va Turkiya hukumatini yarashishga chaqirish maqsadida tashkil etilgan namoyish bo‘layotgan edi. Oxirgi ma’lumotlarga ko‘ra, Anqaradagi terakt qurbonlari soni 120 kishidan oshgan.
Izoh (0)