Yaponiya poytaxti Tokio shahrida badiiy gimnastika bo‘yicha klublar o‘rtasida jahon chempionati bahslari o‘tkazildi, deb xabar beradi O‘zbekiston Milliy olimpiya qo‘mitasi matbuot xizmati.
Bu yilgi musobaqada Yaponiya, O‘zbekiston, Avstriya, Ozarbayjon, Belarus, Belgiya, Rossiya, Italiya, Kanada, Vengriya, Gruziya, Malayziya, Estoniya va yana bir qator davlatlardan jami 20 jamoa g‘oliblik uchun kurash olib bordi.
Musobaqa qoidasiga ko‘ra, har bir jamoada ikkitadan katta yoshdagi va bir nafar kichik yoshdagi sportchilar o‘rin egallashi kerak. O‘zbekiston sharafini himoya qilgan “Garmoniya Elit” jamoasi tarkibidan Anastasiya Serdyukova, Ravilya Farxutdinova va yosh sportchi Sabina Tashkenbayeva o‘rin egalladi.
Qizg‘in kechgan musobaqalar yakunlariga ko‘ra, Sabina Tashkenbayeva yosh gimnastikachilar o‘rtasida o‘tkazilgan shaxsiy hisobdagi musobaqada kumush medal sovrindori bo‘ldi.
Ma’lumot uchun. Mazkur musobaqa 1992-yildan buyon o‘tkazilib kelinadi va unda dunyoning kuchli klublari ishtirok etadi.
Izoh (0)