O‘zbekistonlik Marina Xmelevskaya Germaniyaning Berlin shahrida o‘tkazilgan marafonda ishtirok etib, 2016-yili Braziliyaning Rio-de-Janeyro shahrida bo‘ladigan XXXI yozgi Olimpiada o‘yinlariga yo‘llanma oldi. Bu haqda O‘zA xabar bermoqda.
O‘zbekiston milliy olimpiya qo‘mitasidan ma’lum qilishlaricha, 42 kilometr masofaga o‘tkazilgan marafonda Marina Xmelevskaya 2 soatu 38,36 daqiqada marra chizig‘iga yetib keldi va to‘rt yillikning eng yirik sport anjumanida qatnashish huquqiga sazovor bo‘ldi. UzReport xabariga ko‘ra, marafonda keniyalik Gledis Cherono g‘olib chiqqan.
Qayd etish joiz, Berlin marafonida 131 mamlakatdan 41 ming nafar sportchi qatnashdi.
Ayni paytda o‘zbekistonlik yengil atletikachilardan to‘rt nafari olimpiya o‘yinlari yo‘llanmasiga ega bo‘lgan. Bungacha marafonchi Sitora Hamidova, balandlikka sakrash ustasi Svetlana Radzivil va bosqon uloqtirishda Suhrob Xo‘jayev XXXI yozgi Olimpiada yo‘llanmasini qo‘lga kiritgan edi.
Izoh (0)