Ўзбекистонлик Марина Хмелевская Германиянинг Берлин шаҳрида ўтказилган марафонда иштирок этиб, 2016 йили Бразилиянинг Рио-де-Жанейро шаҳрида бўладиган XXXI ёзги Олимпиада ўйинларига йўлланма олди. Бу ҳақда ЎзА хабар бермоқда.
Ўзбекистон миллий олимпия қўмитасидан маълум қилишларича, 42 километр масофага ўтказилган марафонда Марина Хмелевская 2 соату 38,36 дақиқада марра чизиғига етиб келди ва тўрт йилликнинг энг йирик спорт анжуманида қатнашиш ҳуқуқига сазовор бўлди. UzReport хабарига кўра, марафонда кениялик Гледис Чероно ғолиб чиққан.
Қайд этиш жоиз, Берлин марафонида 131 мамлакатдан 41 минг нафар спортчи қатнашди.
Айни пайтда ўзбекистонлик енгил атлетикачилардан тўрт нафари олимпия ўйинлари йўлланмасига эга бўлган. Бунгача марафончи Ситора Ҳамидова, баландликка сакраш устаси Светлана Радзивил ва босқон улоқтиришда Суҳроб Хўжаев XXXI ёзги Олимпиада йўлланмасини қўлга киритган эди.
Изоҳ (0)