“O‘zekspomarkaz”da sakkizinchi xalqaro ixtisoslashgan UzMedExpo—2015 tibbiyot ko‘rgazmasi ochildi. Bu haqda 29-sentabr, seshanba kuni O‘zA xabar berdi.
Ko‘rgazma O‘zbekiston Sog‘liqni saqlash vazirligi, Savdo-sanoat palatasi, Toshkent shahar hokimligi, “Dori-darmon” kompaniyasi, “O‘zfarmsanoat” konserni, Xorijiy farmatsevtika kompaniyalari va ishlab chiqaruvchilarning mamlakatimizdagi vakolatxonalari uyushmasi ko‘magida IEG Uzbekistan xalqaro ko‘rgazma kompaniyasi tomonidan tashkil etildi.
O‘zbekistonda 1997-yili atigi 2 farmatsevtika korxonasi faoliyat ko‘rsatib, 30 nomga yaqin dori vositalari ishlab chiqarilar edi. Bugun O‘zbekistonda sohada faoliyat yuritayotgan korxonalar soni 149 taga yetib, ular tomonidan 1482 nomdagi dori vositalari ishlab chiqarilmoqda. O‘zbekistonda dori vositalari sifatini nazorat qilish tizimi yaratilgan bo‘lib, ularning tarkibida 8 tibbiy mahsulotlarni sertifikatlashtirish organi, 15 nazorat-tahlil laboratoriyasi faoliyat ko‘rsatmoqda.
An’anaviy UzMedExpo xalqaro tibbiyot ko‘rgazmasi soha mutaxassislarini tibbiy-ilmiy yangiliklar va ishlanmalar, innovatsion loyihalar bilan tanishtirish, mahalliy va xorijiy ishlab chiqaruvchilarning o‘zaro aloqalarini mustahkamlashga xizmat qilmoqda. Ko‘rgazmada mahalliy ishlab chiqaruvchilarning ishtiroki yil sayin ortmoqda. Intermed Innovation, Euro Hearing, BTL Medical Technologies, Ultrasound Scanner Technology Service, Premium Technics, “Soyuz Orion Vostok”, Zilola Medical, “Madad”, UCD Micros, “Shifo-Nur Servis”, Le Asante Cosmetics kabi kompaniyalar shular sirasidandir.
UzMedExpo—2015 tibbiyot ko‘rgazmasida O‘zbekiston, Xitoy, Hindiston, Germaniya, Shvetsiya, Fransiya, Rossiya, Turkiya, Ukraina singari davlatlardan o‘nlab korxona va firmalar ishtirok etmoqda.
Ko‘rgazma stendlarida dori-darmon, tibbiy diagnostika, laboratoriya va davolash uskunalari, tabiiy farmatsevtika va kosmetika mahsulotlari, rentgenologiya, stomatologiya, fizioterapiya, jarrohlik, kardiologiya, tibbiy reabilitatsiya va boshqa sohalarda qo‘llaniladigan yangi preparatlar, mineral qo‘shimchalar va vitaminlar, zamonaviy texnika va texnologiyalar, sanitariya va gigiyena vositalari, tibbiyot sohasi uchun maxsus mebellar namoyish etilmoqda.
Izoh (0)