«Ўзекспомарказ»да саккизинчи халқаро ихтисослашган UzMedExpo—2015 тиббиёт кўргазмаси очилди. Бу ҳақда 29 сентябрь, сешанба куни ЎзА хабар берди.
Кўргазма Ўзбекистон Соғлиқни сақлаш вазирлиги, Савдо-саноат палатаси, Тошкент шаҳар ҳокимлиги, «Дори-дармон» компанияси, «Ўзфармсаноат» концерни, Хорижий фармацевтика компаниялари ва ишлаб чиқарувчиларнинг мамлакатимиздаги ваколатхоналари уюшмаси кўмагида IEG Uzbekistan халқаро кўргазма компанияси томонидан ташкил этилди.
Ўзбекистонда 1997 йили атиги 2 фармацевтика корхонаси фаолият кўрсатиб, 30 номга яқин дори воситалари ишлаб чиқарилар эди. Бугун Ўзбекистонда соҳада фаолият юритаётган корхоналар сони 149 тага етиб, улар томонидан 1482 номдаги дори воситалари ишлаб чиқарилмоқда. Ўзбекистонда дори воситалари сифатини назорат қилиш тизими яратилган бўлиб, уларнинг таркибида 8 тиббий маҳсулотларни сертификатлаштириш органи, 15 назорат-таҳлил лабораторияси фаолият кўрсатмоқда.
Анъанавий UzMedExpo халқаро тиббиёт кўргазмаси соҳа мутахассисларини тиббий-илмий янгиликлар ва ишланмалар, инновацион лойиҳалар билан таништириш, маҳаллий ва хорижий ишлаб чиқарувчиларнинг ўзаро алоқаларини мустаҳкамлашга хизмат қилмоқда. Кўргазмада маҳаллий ишлаб чиқарувчиларнинг иштироки йил сайин ортмоқда. Intermed Innovation, Euro Hearing, BTL Medical Technologies, Ultrasound Scanner Technology Service, Premium Technics, «Союз Орион Восток», Zilola Medical, «Мадад», UCD Micros, «Шифо-Нур Сервис», Le Asante Cosmetics каби компаниялар шулар сирасидандир.
UzMedExpo—2015 тиббиёт кўргазмасида Ўзбекистон, Хитой, Ҳиндистон, Германия, Швеция, Франция, Россия, Туркия, Украина сингари давлатлардан ўнлаб корхона ва фирмалар иштирок этмоқда.
Кўргазма стендларида дори-дармон, тиббий диагностика, лаборатория ва даволаш ускуналари, табиий фармацевтика ва косметика маҳсулотлари, рентгенология, стоматология, физиотерапия, жарроҳлик, кардиология, тиббий реабилитация ва бошқа соҳаларда қўлланиладиган янги препаратлар, минерал қўшимчалар ва витаминлар, замонавий техника ва технологиялар, санитария ва гигиена воситалари, тиббиёт соҳаси учун махсус мебеллар намойиш этилмоқда.
Изоҳ (0)