“O‘zbekkino” Milliy agentligi buyurtmasiga asosan “O‘zbekfilm” kinostudiyasi tomonidan suratga olingan “Hayotda...” badiiy filmi 19—25-sentabr kunlari ilk marotaba tashkil etilgan “Shaken burji” Olmaota xalqaro kinofestivali tanlov dasturida bugun, 23-sentabr kuni namoyish etiladi. Bu haqda “O‘zbekkino” Milliy agentligi matbuot xizmati xabar bermoqda.
2015-yili katta ekranlarga chiqqan “Hayotda...” badiiy filmi yolg‘iz farzandining o‘limidan so‘ng odamlarni davolash qobiliyatiga ega bo‘lgan bolani asrab olib, umrining oxirigacha o‘z tamoyillariga sodiq qolgan olim inson haqida hikoya qiladi. Yolqin To‘ychiyev rejissorligida ishlab chiqarilgan ushbu filmda Baxtiyor Qosimov, Akbarxo‘ja Rasulov, Zulhumor Mo‘minova kabi taniqli aktyorlar suratga tushgan.
Olmaota xalqaro kinofestivali qozoq kino san’ati asoschilaridan biri – Shaken Aymanov tavalludining yuz yilligi munosabati bilan ta’sis etilgan bo‘lib, “Yevrosiyo” xalqaro kinofestivali doirasida o‘tkazilayotgan mazkur tadbir Qozog‘iston va Markaziy Osiyo mintaqasi kinematografiyasini qo‘llab-quvvatlashga yo‘naltirilgan. Xususan, yaqin va uzoq xorijdagi kinoijodkorlar o‘rtasidagi ijodiy aloqalarni rivojlantirish kinoanjumanning asosiy vazifalaridan biri hisoblanadi.
Qayd etish joiz, “Hayotda...” filmi joriy yil ikkinchi marta xalqaro kinofestival ishtirokchisiga aylandi. Bungacha Yolqin To‘ychiyevning mazkur kartinasi Rossiyaning Anapa shahrida bo‘lib o‘tgan MDH va Boltiqbo‘yi mamlakatlarining “Kinoshok” festivalida qatnashgan edi.
Izoh (0)