«Ўзбеккино» Миллий агентлиги буюртмасига асосан «Ўзбекфильм» киностудияси томонидан суратга олинган «Ҳаётда...» бадиий фильми 19—25 сентябрь кунлари илк маротаба ташкил этилган «Шакен буржи» Олмаота халқаро кинофестивали танлов дастурида бугун, 23 сентябрь куни намойиш этилади. Бу ҳақда «Ўзбеккино» Миллий агентлиги матбуот хизмати хабар бермоқда.
2015 йили катта экранларга чиққан «Ҳаётда...» бадиий фильми ёлғиз фарзандининг ўлимидан сўнг одамларни даволаш қобилиятига эга бўлган болани асраб олиб, умрининг охиригача ўз тамойилларига содиқ қолган олим инсон ҳақида ҳикоя қилади. Ёлқин Тўйчиев режиссёрлигида ишлаб чиқарилган ушбу фильмда Бахтиёр Қосимов, Акбархўжа Расулов, Зулҳумор Мўминова каби таниқли актёрлар суратга тушган.
Олмаота халқаро кинофестивали қозоқ кино санъати асосчиларидан бири – Шакен Айманов таваллудининг юз йиллиги муносабати билан таъсис этилган бўлиб, «Евросиё» халқаро кинофестивали доирасида ўтказилаётган мазкур тадбир Қозоғистон ва Марказий Осиё минтақаси кинематографиясини қўллаб-қувватлашга йўналтирилган. Хусусан, яқин ва узоқ хориждаги киноижодкорлар ўртасидаги ижодий алоқаларни ривожлантириш киноанжуманнинг асосий вазифаларидан бири ҳисобланади.
Қайд этиш жоиз, «Ҳаётда...» фильми жорий йил иккинчи марта халқаро кинофестиваль иштирокчисига айланди. Бунгача Ёлқин Тўйчиевнинг мазкур картинаси Россиянинг Анапа шаҳрида бўлиб ўтган МДҲ ва Болтиқбўйи мамлакатларининг «Киношок» фестивалида қатнашган эди.
Изоҳ (0)