Moskvada 23-sentabr kuni foydalanishga topshirilgan Yevropadagi eng katta jome’ masjidining ochilish marosimida Rossiya prezidenti Vladimir Putin Qur’ondan iqtibos keltirdi. Bu haqda “Korrespondent.net” xabar bermoqda.
“Jome’ masjidi nafaqat Moskva musulmonlari, balki butun Rossiya uchun muhim ma’naviy markaz, ma’rifat manbai, insonparvar g‘oyalar, Islomning samimiy, haqiqiy qadriyatlari taraladigan, bilim va ma’naviyat ulashadigan, ezgu amallar yo‘lida nafaqat musulmonlarning, balki boshqa diniy e’tiqod vakillarining harakatlarini birlashtirishga yordam beradigan maskanga aylanishiga ishonchim komil”, — dedi Putin.
“Qur’onda shunday deyiladi: “Ezgu amallarda bir-biringizdan o‘zishga harakat qiling”, — deya, Rossiya prezidenti musulmonlarning muqaddas ilohiy kitobidan iqtibos keltirdi.
Putinning qayd etishicha, Yaqin Sharqdagi terrorchilar “buyuk jahon dinini oyoqosti qilib”, odamlarni o‘ldirmoqda va jahon madaniyat yodgorliklarini vayron etmoqda. “Ularning g‘oyasi yolg‘on ustiga, Islomni ochiq-oydin bulg‘ash asosiga qurilgan. Ular bizning mamlakatimizdan ham o‘z hamfikrlarini topishga intilmoqda”, — dedi Rossiya davlat rahbari.
Shuningdek, Rossiya prezidenti yosh musulmonlar an’anaviy Islom qadriyatlari asosida tarbiyalanishini ta’minlash uchun Rossiya musulmonlari diniy maktabini tashkil etish davlat tomonidan qo‘llab-quvvatlanishiga va’da berdi.
Izoh (0)