Москвада 23 сентябрь куни фойдаланишга топширилган Европадаги энг катта жомеъ масжидининг очилиш маросимида Россия президенти Владимир Путин Қуръондан иқтибос келтирди. Бу ҳақда «Корреспондент.net» хабар бермоқда.
«Жомеъ масжиди нафақат Москва мусулмонлари, балки бутун Россия учун муҳим маънавий марказ, маърифат манбаи, инсонпарвар ғоялар, Исломнинг самимий, ҳақиқий қадриятлари тараладиган, билим ва маънавият улашадиган, эзгу амаллар йўлида нафақат мусулмонларнинг, балки бошқа диний эътиқод вакилларининг ҳаракатларини бирлаштиришга ёрдам берадиган масканга айланишига ишончим комил», — деди Путин.
«Қуръонда шундай дейилади: «Эзгу амалларда бир-бирингиздан ўзишга ҳаракат қилинг», — дея, Россия президенти мусулмонларнинг муқаддас илоҳий китобидан иқтибос келтирди.
Путиннинг қайд этишича, Яқин Шарқдаги террорчилар «буюк жаҳон динини оёқости қилиб», одамларни ўлдирмоқда ва жаҳон маданият ёдгорликларини вайрон этмоқда. «Уларнинг ғояси ёлғон устига, Исломни очиқ-ойдин булғаш асосига қурилган. Улар бизнинг мамлакатимиздан ҳам ўз ҳамфикрларини топишга интилмоқда», — деди Россия давлат раҳбари.
Шунингдек, Россия президенти ёш мусулмонлар анъанавий Ислом қадриятлари асосида тарбияланишини таъминлаш учун Россия мусулмонлари диний мактабини ташкил этиш давлат томонидан қўллаб-қувватланишига ваъда берди.
Изоҳ (0)