Checheniston rahbari Ramzan Qodirov respublikada maxsus bo‘linmalar jangovar tayyorgarligining to‘satdan tekshiruvdan o‘tkazilishi mintaqada Suriyadan kelgan jangarilar bilan bog‘liqligini inkor etdi. Bu haqda “TASS” xabar bermoqda.
“Kuch tizimlarining to‘satdan tekshiruvdan o‘tkazilishi odatiy amaliyot va bu biz tomonimizdan o‘ylab topilmagan, — deya ta’kidlagan Qodirov. — Mish-mishlarga kelsak, hatto ‘shaytonlar’ bunday qaltis harakatga jur’at etib, Chechenistonda paydo bo‘lganida ham ularni Grozniyda 2014-yil dekabrida tartibsizlik uyushtirganlarning qismati kutadi. O‘shanda bu g‘alamislarning barchasi yo‘q qilingan edi”.
Eslatib o‘tamiz, sentabr oyi boshida Rossiya ichki ishlar vazirining o‘rinbosari Viktor Zolotov Chechenistonda OMON tayyorgarligini qo‘qqisdan tekshiruvdan o‘tkazdi. Tekshiruv yakunlangach, Ramzan Qodirov Instagram’dagi sahifasi orqali maxsus bo‘linmalar tomonidan to‘la jangovar saflanish to‘g‘risidagi buyruq besh daqiqada amalga oshirilganini ma’lum qildi.
Izoh (0)