Чеченистон раҳбари Рамзан Қодиров республикада махсус бўлинмалар жанговар тайёргарлигининг тўсатдан текширувдан ўтказилиши минтақада Суриядан келган жангарилар билан боғлиқлигини инкор этди. Бу ҳақда «ТАСС» хабар бермоқда.
«Куч тизимларининг тўсатдан текширувдан ўтказилиши одатий амалиёт ва бу биз томонимиздан ўйлаб топилмаган, — дея таъкидлаган Қодиров. — Миш-мишларга келсак, ҳатто ‘шайтонлар’ бундай қалтис ҳаракатга журъат этиб, Чеченистонда пайдо бўлганида ҳам уларни Грознийда 2014 йил декабрида тартибсизлик уюштирганларнинг қисмати кутади. Ўшанда бу ғаламисларнинг барчаси йўқ қилинган эди».
Эслатиб ўтамиз, сентябрь ойи бошида Россия ички ишлар вазирининг ўринбосари Виктор Золотов Чеченистонда ОМОН тайёргарлигини қўққисдан текширувдан ўтказди. Текширув якунлангач, Рамзан Қодиров Instagram’даги саҳифаси орқали махсус бўлинмалар томонидан тўла жанговар сафланиш тўғрисидаги буйруқ беш дақиқада амалга оширилганини маълум қилди.
Изоҳ (0)