Rossiyaning Sputnik agentligi o‘zbek tilidagi saytini ishga tushirdi

Sputnik multimedia axborot agentligi “Sputnik O‘zbekiston” axborot portalini ishga tushirdi. Bu haqda “RIA Novosti” xabar bermoqda.

Yangi portal o‘zbek va rus tillarida faoliyat olib boradi. Loyiha sputniknews-uz.com, oz.sputniknews-uz.com, ru.sputniknews-uz.com manzillarida joylashgan bo‘lib, dolzarb xalqaro mavzulardagi xilma-xil fikrlarni yoritishga ixtisoslashgan.

Portalning o‘zbek tilidagi talqini Sputnik’ning abxaz, arab, arman, gruzin, doriy, ingliz, ispan, kurd, qozoq, qrim-tatar, qirg‘iz, latish, moldovan, ozarbayjon, nemis, polyak, portugal, pushtu, serb, turk, tojik, ukrain, fin, fransuz, xitoy, hind, eston va yapon tillaridagi versiyalari qatorini to‘ldiradi.

“Sputnik o‘z mushtariylariga turfa kontent — infografika, video, fotoreportajlar, onlayn efirlar, internet-so‘rovnomalarni, yangiliklardan tashqari tahliliy maqolalar, eksklyuziv intervyular va ekspertlarning mulohazalarini taklif qiladi”, — deyiladi agentlik xabarida.