O‘zbekiston Milliy matbuot markazida milliy kinematografiya san’atini rivojlantirish masalalariga bag‘ishlangan matbuot anjumani o‘tkazildi. Bu haqda O‘zA xabar bermoqda.
“Lolaqizg‘aldoq”, “So‘nggi pushaymon”, “Kuzning bir kuni”, “Toliqqan ko‘ngillar oyga talpinar”, “Ma’suma” nomli badiiy filmlarni suratga olish ishlari boshlandi. “No‘xat polvon” va “Oqbo‘yin” multfilmlari, “Oyqiz ertagi”, “Ustyurtga yo‘l”, “Ajal jodusi”, “Dadil bo‘l, Kamoliddin!”, “Barakasini bersin” singari filmlarni suratga olish davom etmoqda.
Agentlikning 2014—2015-yillarga mo‘ljallangan hujjatli filmlar ishlab chiqarish rejasiga binoan “Zavol bilmas umr”, “O‘g‘lonlar”, “Ehtirom”, “Iz”, “Usta”, “Agar sen haq bo‘lsang...”, “San’atning bebaho xazinasi” kabi hujjatli filmlar ustidagi ishlar nihoyasiga yetkazildi.
Nodavlat kinostudiyalar tomonidan suratga olingan 28 filmning belgilangan litsenziya talablari va shartlariga mosligi o‘rganib chiqildi. Bir qator filmlar mazkur talablarga javob bermagani sababli ularning namoyishiga ruxsat berilmadi.
«Keksalarni e’zozlash yili» Davlat dasturi doirasida «Umrboqiy siymolar» va «Zamon va taqdirlar» turkumida taniqli olimlar, mohir musavvirlar, el suygan san’atkorlarning hayoti va faoliyati haqida hikoya qiluvchi o‘ndan ortiq hujjatli film, «Qari bilganni pari bilmas» multiplikatsion filmlar turkumini yaratish ishlari davom etmoqda.
O‘tgan vaqt mobaynida bir qator xorijiy davlatlarda «O‘zbek kinosi kunlari» bo‘lib o‘tdi. Alohida qayd etilishicha, O‘zbekiston kinoijodkorlarining ekran asarlari xalqaro kinofestivallarda namoyish etilmoqda.
Izoh (0)