Honda nosozlik tufayli besh millionga yaqin avtomobilni chaqirib oladi

Yaponiyaning Honda Motor Co. kompaniyasi Takata Corp. tomonidan ishlab chiqariladigan xavfsizlik yostiqchasidagi nosozlik tufayli dunyo bo‘ylab 4,9 millionta avtomobilni qaytarib olishini e’lon qildi, deb xabar bermoqda “Korrespondent.net”.

Yaponiyaning o‘zida 1,72 millionta avtomobil nosozlikni bartaraf etish uchun qaytarib olinadi. Honda avvalroq xuddi shu muammo tufayli 14 millionta avtomobilni qaytarib olgan.

Avvalroq Toyota Motor Corp. va Nissan Motor Co. ham xuddi shu nosozlik tufayli  jami 6,56 millionta avtomobilni chaqirib olishini e’lon qilgan. Bungacha 10 dan ortiq kompaniya jami 25 millionta avtomobilni 2008-yildan buyon ishlab chiqarilgan Takata xavfsizlik yostiqchalaridagi muammo tufayli qaytarib olgan. Ushbu nosozlik kamida 10 ta o‘limli vaziyatga olib kelgani taxmin qilinadi.