2014-yilda jahon bo‘ylab 118 nafar jurnalist xizmat vazifasini bajarish vaqtida halok bo‘ldi

2014-yili xizmat vazifasini bajarish vaqtida jahon bo‘yicha 118 nafar jurnalist halok bo‘ldi, 2015-yilda ham OAV xodimlarining hayoti xavf ostida qolmoqda. Bu haqda Xalqaro jurnalistlar federatsiyasi prezidenti Jim Bumela 13-aprel kuni Janubiy Koreyada ochilgan Xalqaro OAV konferensiyasida ma’lum qildi, deya xabar bermoqda “RIA Novosti”.

“Bugun so‘z nafaqat jurnalistika kelajagi haqida, balki ba’zi mamlakatlarda bu soha vakillarining jismoniy jihatdan omon qolish imkoniyati to‘g‘risida bormoqda”, - dedi Bumela. Uning so‘zlariga ko‘ra, jurnalistlar nafaqat xizmat vazifasini bajarish vaqtida halok bo‘lishmoqda, aksariyat holatlarda zo‘ravonlarning hujumlari nishoniga aylanishmoqda.

“Har yili Xalqaro jurnalistlar federatsiyasi jurnalistlarga nisbatan ro‘y bergan qotilliklarning tafsilotlarini e’lon qilib boradi. O‘tgan yili 118 nafar jurnalist halok bo‘ldi. Biz tafsilotlarni ham yozamiz, chunki bu o‘limlar – shunchaki statistika emas, ular o‘z hayotini professional burchni bajarishga bag‘ishlab, buning uchun g‘oyat katta haq to‘lagan do‘stlarimiz va hamkasblarimizdir”, - deya qayd etdi Bumela.

Xalqaro jurnalistlar federatsiyasi rahbarining qayd etishicha, jurnalistlarning o‘limi soni o‘sib bormoqda: 2015-yilning dastlabki ikki oyining o‘zidayoq 2014-yilgi statistikaning to‘rtdan biricha OAV vakili halok bo‘ldi. “Jurnalistlarning xavfsizligi masalasi – erkinlik va demokratiya rivojlanishining bosh masalasidir”, - deya qo‘shimcha qildi Bumela.