Toshkent viloyatida temiryo‘l sexi boshlig‘i 250 million so‘mlik moddiy boyliklarni o‘z manfaatlari yo‘lida pullab yubordi
SVOJJDLQK departamentining Toshkent viloyat boshqarmasi bo‘lim bosh taftishchisining ma’lum qilishicha, “Bekobodyo‘lsanoat” ishlab chiqarish korxonasining temiryo‘l sexiga 2001-yildan beri rahbarlik qilib kelgan shaxs o‘zining moddiy javobgarligida bo‘lgan davlat mulkini o‘zlashtirish yo‘li bilan talon-taroj qilganligi fosh etildi. Bu haqda “Huquq” gazetasi xabar bermoqda.
Avvaliga sex boshlig‘i korxonaning temiryo‘l sexiga tegishli bo‘lgan teplovoz dvigatelini noma’lum shaxslarga pullab yuborgan. Keyingi safar yuk tashuvchi vagonlarni bo‘laklarga bo‘lib, arzimagan pul evaziga noma’lum shaxslarga sotib yuboravergan. Shu tariqa, u 7 vagonni pullab, mablag‘larini o‘z manfaati uchun ishlatgan.
Sudga oid tovarshunoslik ekspertizasining xulosasiga ko‘ra, sex boshlig‘i sotib yuborgan vagonlar har birining bahosi 7 milliondan 9 million so‘mgachani tashkil etgan. U sotgan birgina teplovoz dvigatelining bahosi esa 185 million 640 ming so‘m bo‘lgan. Tergov jarayonida aniqlanishicha, bu kimsa tomonidan talon-taroj qilingan moddiy boyliklar 249 million 810 ming so‘mni tashkil etgan.
Jinoyat ishlari bo‘yicha Bekobod tuman sudi hukmi bilan sex boshlig‘i umrining 6 yilini panjara ortida o‘tkazadigan bo‘ldi. Shuningdek, bu kimsa tomonidan davlatga yetkazilgan zarar to‘liq qoplanadigan bo‘ldi.
