Avstraliya, Malayziya va Indoneziya fuqaro samolyotlarini turli hodisalar yuz bergan holatda qidirishni yengillashtirishi kutilayotgan yangi kuzatuv tizimga asos soldi, deb xabar bermoqda “Rossiyskaya gazeta”. Bu bir yil oldin Kuala-Lumpur−Pekin yo‘nalishi bo‘ylab uchgan Malaysia Airlines aviakompaniyasining Boeing samolyoti yo‘qolib qolganiga javob tariqasida tashkil etildi.
Avstraliya bosh vaziri o‘rinbosari Uorren Trassning so‘zlariga ko‘ra, tizim har 15 daqiqada avtomatik ravishda laynerning joylashuvi haqida signal berib turadi. Hozirda ushbu oraliq 30−40 daqiqani tashkil qiladi. Samolyot belgilangan havo koridoridan 60 metr va undan yuqoriga yoki ikki va undan ortiq dengiz mili masofasida uzoqlashsa, tizim avtomatik ravishda intensive rejimga o‘tib, har besh daqiqada ma’lumot jo‘natadi yoki butunlay real vaqt rejimida kuzatishga o‘tadi.
Yangi tizim hozirda laynerlarning 90 foizdan ortig‘ida qo‘llanilayotgan monitoring tizimiga asoslanadi. Sinov vaqtida Avstraliyaning Brisben, Melburn, shuningdek Malayziya va Indoneziyaning qator shaharlari dispetcherlik markazlari harakatga keltiriladi.
Izoh (0)