Cho‘ntak soati ko‘rinishidagi yog‘och smartfon shu yilning martida chiqariladi, deya xabar bermoqda “Rossiyskaya gazeta”. AQShning Kaliforniya shtatida joylashgan Monohm startapi “kelajak gadjeti”ni kelasi hafta Barselonada bo‘lib o‘tadigan Mobile World Congress konferensiyasida taqdim etmoqchi.
Runcible smartfoni ishlab chiquvchilari fikricha, ular “smartfondan keyingi davr” qurilmasini o‘ylab topgan. Devaysning asosiy o‘ziga xos jihati — uning shakli. Yumaloq va biroz egik yog‘och korpusi smartfonni cho‘ntak soatiga o‘xshatib qo‘yadi.
Gadjetning old panelida ekran, orqa panelida kamera joylashgan. Kompaniyadagilar yangi qurilmaning originalligi hisobidan foydalanuvchilar e’tiborini jalb etmoqchi.
Runcible mobil telefonning asosiy funksiyalarini bajaradi. Uning yordamida qo‘ng‘iroq qilish, xabar jo‘natish va qabul qilish, internetga kirish va suratga tushirish mumkin. Biroq yog‘och smartfonda turli-tuman dasturlar mavjud bo‘lmaydi.
Ishlab chiquvchilarning ishonch bilan ta’kidlashicha, “yangi qurilma odamlarga real hayotga qaytishga va jonli muloqotni qayta tiklashga yordam beradi”, chunki foydalanuvchilar o‘z vaqtini ijtimoiy tarmoqlar, messenjerlar va o‘yinlarga sarflamaydi.
Izoh (0)