Rossiya Tashqi ishlar vazirligining rasmiy vakili Aleksandr Lukashevich AQShda “Vneshekonombank” vakili Yevgeniy Buryakovning josuslikda ayblanib hibsga olinishi yuzasidan fikr bildirdi, deb xabar bermoqda “RBK”.
“Amerika hukumati yana o‘zlarining sevimli josuslik o‘yinlarini avj oldirish amaliyotiga o‘tishga qaror qilganga o‘xshaydi. Rossiya−AQSh munosabatlari Vashingtonning dushmanona yo‘nalishi tufayli anchadan buyon qiyin davrni boshidan kechirmoqda. ‘Qancha yomon bo‘lsa, shuncha yaxshi’ tamoyili bilan harakatlanayotgan AQSh Rossiyaga qarshi kompaniyaning navbatdagi to‘plamini ishga tushirmoqchi ko‘rinadi”, − deyiladi bayonotda.
Shuningdek, Lukashevich bunday harakatlar o‘zaro hamkorlik istiqbollarining darz ketishiga sabab bo‘lishini ta’kidlab, ularning oqibatlarini “tashabbuschilarning vijdoniga” havola qilgan. Rossiya TIV AQSh maxsus xizmatlari tomonidan Rossiya vakillariga qarshi qo‘llanilayotgan provokatsiya harakatlarini to‘xtatishni talab qilgan. Moskva Buryakovga konsullik imkoniyatlari taqdim etilishini va “Rossiya fuqarosining huquqlariga so‘zsiz rioya qilinishi”ni talab qilgan.
Rossiya banki xodimi iqtisodiy razvedka ma’lumotlarini yig‘ishda ayblanib qo‘lga olinganini Federal qidiruv byurosi 26-yanvar kuni e’lon qilgan. AQSh rasmiylari Buryakovdan tashqari Rossiyaning Nyu-Yorkdagi savdo vakolatxonasi rahbari Igor Sporishevni hamda Rossiyaning BMTdagi doimiy vakolatxonasi attashesi Viktor Podobnovni ham josuslikda ayblagan. Biroq Buryakov qo‘lga olingan vaqtda ular AQSh hududini tark etib bo‘lgan.
FQB 2012-yil martdan 2014-yil sentabrgacha gumondorlarning 48 ta qisqa uchrashuvini qayd etgan. AQSh tomonining ma’lum qilishicha, kuzatishni qiyinlashtirish uchun odam ko‘p bo‘lgan joylarda, asosan ko‘chalarda bo‘lgan uchrashuvlar chog‘ida Buryakov Sporishevga nimalarnidir bergan. FQB ularni to‘g‘ridan-to‘g‘ri Rossiya Tashqi razvedka xizmati uchun ishlashda ayblayapti.
Izoh (0)