Россия Ташқи ишлар вазирлигининг расмий вакили Александр Лукашевич АҚШда «Внешекономбанк» вакили Евгений Буряковнинг жосусликда айбланиб ҳибсга олиниши юзасидан фикр билдирди, деб хабар бермоқда «РБК».
«Америка ҳукумати яна ўзларининг севимли жосуслик ўйинларини авж олдириш амалиётига ўтишга қарор қилганга ўхшайди. Россия−АҚШ муносабатлари Вашингтоннинг душманона йўналиши туфайли анчадан буён қийин даврни бошидан кечирмоқда. ‘Қанча ёмон бўлса, шунча яхши’ тамойили билан ҳаракатланаётган АҚШ Россияга қарши компаниянинг навбатдаги тўпламини ишга туширмоқчи кўринади», − дейилади баёнотда.
Шунингдек, Лукашевич бундай ҳаракатлар ўзаро ҳамкорлик истиқболларининг дарз кетишига сабаб бўлишини таъкидлаб, уларнинг оқибатларини «ташаббусчиларнинг виждонига» ҳавола қилган. Россия ТИВ АҚШ махсус хизматлари томонидан Россия вакилларига қарши қўлланилаётган провокация ҳаракатларини тўхтатишни талаб қилган. Москва Буряковга консуллик имкониятлари тақдим этилишини ва «Россия фуқаросининг ҳуқуқларига сўзсиз риоя қилиниши»ни талаб қилган.
Россия банки ходими иқтисодий разведка маълумотларини йиғишда айбланиб қўлга олинганини Федерал қидирув бюроси 26 январь куни эълон қилган. АҚШ расмийлари Буряковдан ташқари Россиянинг Нью-Йоркдаги савдо ваколатхонаси раҳбари Игорь Споришевни ҳамда Россиянинг БМТдаги доимий ваколатхонаси атташеси Виктор Подобновни ҳам жосусликда айблаган. Бироқ Буряков қўлга олинган вақтда улар АҚШ ҳудудини тарк этиб бўлган.
ФҚБ 2012 йил мартдан 2014 йил сентябргача гумондорларнинг 48 та қисқа учрашувини қайд этган. АҚШ томонининг маълум қилишича, кузатишни қийинлаштириш учун одам кўп бўлган жойларда, асосан кўчаларда бўлган учрашувлар чоғида Буряков Споришевга нималарнидир берган. ФҚБ уларни тўғридан-тўғри Россия Ташқи разведка хизмати учун ишлашда айблаяпти.
Изоҳ (0)