O‘zbekistonda hukumat qarori bilan nafaqa tayinlash uchun yetarli ish stajiga ega bo‘lmagan keksa va ishga layoqatsiz kishilarga nafaqa puli berish tartibiga qo‘shimchalar kiritildi. Bu haqda “Kun.uz” xabar bermoqda.
Endilikda nafaqa puli nafaqat O‘zbekiston fuqarolariga, balki respublikada doimiy ravishda yashayotgan fuqarolikka ega bo‘lmagan xorijiy shaxslarga ham beriladi.
Bunda, nafaqaxo‘rlar yashash joyi bo‘yicha doimiy ro‘yxatdan o‘tmagan yoki vaqtinchalik o‘tgan bo‘lsa (Toshkent shahri yoki Toshkent viloyatidan) nafaqa faqat uning amal qilishi muddatida to‘lanadi. O‘zbekistonda doimiy ravishda yashayotgan fuqaroligi yo‘q bo‘lgan xorijiy fuqaroga nafaqa uning vaqtinchalik yashash uchun ruxsatnomasi amal qilishi muddati davomida to‘lanadi.
Mutaxassislarning ta’kidlashicha, bu me’yor O‘zbekistonda 2015-yilni “Keksalarni e’zozlash yili” deb e’lon qilinishi munosabati bilan qabul qilingan.
Bundan tashqari, yangi o‘zgarishlarga ko‘ra, endilikda O‘zbekistonda boquvchisini yo‘qotgan taqdirda butun oila a’zolariga umumiy nafaqa tayinlanadi. Biroq, oila a’zosining talabi bilan nafaqaning unga tegishli qismi faqat uning o‘ziga alohida to‘lanishi mumkin. Bunda tayinlangan nafaqa puli oila a’zolari o‘rtasida teng miqdorda taqsimlanadi.
Qaror bilan nafaqadan barcha ushlanmalar faqatgina sud qarori yoki nobyudjet pensiya jamg‘armasining tuman yoki shahar bo‘limlari qarori bilan amalga oshirilishi haqidagi me’yor ham kiritildi.
Xususan, jamg‘arma nafaqaxo‘rdan uning ataylab xato ma’lumotlar asosida tuzilgan hujjatlarni taqdim qilishi, hisob-kitobdagi yoki texnik xato tufayli nafaqani to‘lashda ortiqcha to‘langan pullarni ushlab qolishga haqli.
Boquvchisini yo‘qotganlik munosabati bilan nafaqa oluvchi fuqarolardan nafaqani to‘lashda oila a’zolari tarkibidagi o‘zgarishlar haqidagi ma’lumotlarni taqdim qilmaganlik, hisob-kitobdagi yoki texnik xato tufayli pullar ushlab qolinishi mumkin.
Izoh (0)