Ўзбекистонда ҳукумат қарори билан нафақа тайинлаш учун етарли иш стажига эга бўлмаган кекса ва ишга лаёқатсиз кишиларга нафақа пули бериш тартибига қўшимчалар киритилди. Бу ҳақда «Kun.uz» хабар бермоқда.
Эндиликда нафақа пули нафақат Ўзбекистон фуқароларига, балки республикада доимий равишда яшаётган фуқароликка эга бўлмаган хорижий шахсларга ҳам берилади.
Бунда, нафақахўрлар яшаш жойи бўйича доимий рўйхатдан ўтмаган ёки вақтинчалик ўтган бўлса (Тошкент шаҳри ёки Тошкент вилоятидан) нафақа фақат унинг амал қилиши муддатида тўланади. Ўзбекистонда доимий равишда яшаётган фуқаролиги йўқ бўлган хорижий фуқарога нафақа унинг вақтинчалик яшаш учун рухсатномаси амал қилиши муддати давомида тўланади.
Мутахассисларнинг таъкидлашича, бу меъёр Ўзбекистонда 2015 йилни «Кексаларни эъзозлаш йили» деб эълон қилиниши муносабати билан қабул қилинган.
Бундан ташқари, янги ўзгаришларга кўра, эндиликда Ўзбекистонда боқувчисини йўқотган тақдирда бутун оила аъзоларига умумий нафақа тайинланади. Бироқ, оила аъзосининг талаби билан нафақанинг унга тегишли қисми фақат унинг ўзига алоҳида тўланиши мумкин. Бунда тайинланган нафақа пули оила аъзолари ўртасида тенг миқдорда тақсимланади.
Қарор билан нафақадан барча ушланмалар фақатгина суд қарори ёки нобюджет пенсия жамғармасининг туман ёки шаҳар бўлимлари қарори билан амалга оширилиши ҳақидаги меъёр ҳам киритилди.
Хусусан, жамғарма нафақахўрдан унинг атайлаб хато маълумотлар асосида тузилган ҳужжатларни тақдим қилиши, ҳисоб-китобдаги ёки техник хато туфайли нафақани тўлашда ортиқча тўланган пулларни ушлаб қолишга ҳақли.
Боқувчисини йўқотганлик муносабати билан нафақа олувчи фуқаролардан нафақани тўлашда оила аъзолари таркибидаги ўзгаришлар ҳақидаги маълумотларни тақдим қилмаганлик, ҳисоб-китобдаги ёки техник хато туфайли пуллар ушлаб қолиниши мумкин.
Изоҳ (0)