2015-yilda O‘zbekistonda qishloq joylarda namunaviy loyihalar bo‘yicha 12 mingta yakka tartibdagi uy-joy quriladi. Bu haqda O‘zbekiston Respublikasi Prezidentining “2015-yilda Qishloq joylarda namunaviy loyihalar bo‘yicha yakka tartibdagi uy-joy qurilishi dasturi va 2016-yilgi qurilishning asosiy parametrlari to‘g‘risida”gi qarori (pdf)da aytiladi.
Hujjat qishloq aholi punktlarining arxitektura-rejalashtirish qiyofasini yanada tubdan yaxshilash, namunaviy loyihalar bo‘yicha yakka tartibdagi uy-joy qurilishi ko‘lamini kengaytirish, qishloqda transport, muhandislik-kommunikatsiya va ijtimoiy infratuzilma obyektlarini jadal rivojlantirish hisobiga qishloq aholisining turmush darajasi va sifatini oshirish maqsadida qabul qilindi.
Qarorga muvofiq, 292 ta massivda 12 mingta yakka tartibdagi uy-joylar quriladi. Dastur doirasida 277,4 km suv ta’minoti tarmoqlari, 273,5 km elektr ta’minoti tarmoqlari, 283,9 km gaz ta’minoti tarmoqlari va 244,4 km avtomobil yo‘llari qurilishi rejalashtirilgan.
2015-yilda qishloq joylarda uy-joylar qurilishiga umumiy qiymati 500 million dollarga teng “Qishloq joylarda uy-joy qurilishini rivojlantirish” loyihasini moliyalashtirishning ko‘p transhli dasturi uchinchi transhi doirasida Osiyo taraqqiyot bankining 100 million dollarga teng zayom mablag‘lari yo‘naltiriladi.
Hujjatda aytilishicha, 2016-yilda O‘zbekistonda 305 ta massivda 13 mingta yakka tartibdagi uy-joy quriladi.
Izoh (0)